ጣዕሞት

የተሰረቀው ውድ ስዕል

በእውቁ የደች ሰዓሊ ቫን ጎ የተሳለ ስዕል፤ በኮሮና ምክንያት ተዘግቶ ከነበረው በሆላንድ ከሚገኘው የሲንገር ላረን ሙዚየም ውስጥ በዘራፊዎች ተሰረቀ። ስዕሉ ሊሰረቅ የቻለው ድቀድቅ ጨለማን ተገን አድርገው በኮሮና ምክንያት በተዘጋው ሙዚየም ውስጥ ሰብረው በመግባት ዝርፊያ በፈፀሙ ሌቦች ነው። እሁድ ማታ ላይ የተሰረቀው ስዕሉ፤ መሰረቁ ሊታወቅ የቻለው ሰኞ ጠዋት ላይ ሲሆን፤ ከከሰዓት ላይም ሰዎች አዘውትረው የሚመለከቱት የፊት ለፊቱ የመስታወት በር በነጭ ፓነል ተሸፍኖ ሊታይ ችሏል።

የሙዚየሙ ዳይሬክተር የሆኑት ኤቨርት ቫን ኦስ፤ በዝርፊያው ምክንያት “እጅግ በጣም ተበሳጭቻለሁ፤ ተናድጂያለሁ” ሲሉ ተሰምተዋል። “በሙዚያማችን የሚገኘው በታላቁ ሰዓሊ የተሳለው አስደናቂ ስዕል ከሙዚየማችን ተሰርቋል። ከህብረተሰባችን ተዘርፏል” ሲሉ የተደመጡት ደግሞ ጃን ሩዶልፍ ደ ሎርም የተባሉ የሙዚየሙ ሌላኛው ዳይሬክተር ናቸው።

ፖሊሶች ለጋዜጠኞች እንዳስታወቁት ስዕሉ ሊሰረቅ የቻለው፤ ሌቦች የመስታወት በሩን ሰብረው ገብተው እንደሆነ ነው። መስታወቱ ሲሰበር አላርም (የማስጠንቀቂያ ደወል) መጮሁን ያስታወሱት ፖሊሶቹ፤ ምንም እንኳ ፈጥነው ወደሙዚየሙ ቢሄዱም ሌቦቹን ሊያገኙ እንዳልቻሉም ጨምረው ገልፀዋል። ዘግይተው በቦታው የደረሱት የፖሊስ ኃይል አባላት እና የፎረንሲክ ባለሞያዎች በሙዚየሙ የሚገኙ በድብቅ ካሜራ የተቀረፁ ቪዲዮዎች ለማየትም ሞክረዋል።

የሲንገር ላረን ሙዚየም ከዚህ በፊትም በ2007 እ.አ.አ. በታለቁ ቀራፂ አውገስት ሮዲን የተሰራው “ዘ ቲንከር” የሚባለው ቅርፅ ተሰርቆ ነበር። ከዋናው “ዘ ቲንከር” ቅርፅ በተጨማሪም፤ ከመዳብ የተሰራ በራሱ በአውገስት የተቀረፀ “ዘ ቲንከር” የተባለ ቅርፅም ጨምሮ ሊሰረቅ ችሏል። ያኔ ታዲያ የተሰረቀው ዋናው “ዘ ቲንከር” ከጥቂት ቀናት በኋላ፤ ይህ ውድ ቅርጽ ሲገኝ ታዲያ አንድ እግሩ ጠፍቶ ነበር።

ሙዚየሙ ሌቦቹን ጠቁሞ ላስያዘ ሰው የ10 ሚሊዮን ዶላር ሽልማት ያዘጋጀ ሲሆን፤ የቫን ጎ ስዕልን የሰረቁ ሰዎች ግን እስካሁን ድረስ ሊገኙ አልቻሉም። ከቪዲዮ ማስረጃው እንደተረጋገጠው ሌቦቹ በምሽት ዘጠኝ ሰዓት በሞተርሳይክል መጥተው ነው ስዕሉን የሰረቁት። ይህ ውድ ስዕል በገበያ ዋጋ በመቶ ሚሊዮን ዶላሮች የሚገመት ሲሆን፤ በጥቁር ገበያ ግን ከዛም ባነሰ ዋጋ ሊሸጥ እንደሚችል ግምቶች አሉ። የስዕሉ መሰረቅ እንደተሰማ በዓለማችን የሚገኙ ትልልቅ ሚዲያዎች እንደ አልጀዚራ፣ ዴይሊ ኒውስ፣ እና ኒውዮርክ ታይምስ የመሳሰሉ ዜናውን እየተቀባበሉ ዘግበውታል።

ብዙዎች በኔዘርላንድ የሚገኙ ሙዚየሞች በተደጋጋሚ ጊዜ ለመዘረፋቸው ዋናው ምክንያት፤ በተሰረቀ እቃ ላይ ያለው አወዛጋቢው የሃገሪቱ ህግ ነው ይላሉ። በኔዘርላንድ ህግ መሠረት፤ አንድ እቃ ከተሰረቀ ከ30 ዓመታት በኋላ የባለቤቱ ንብረት መሆኑ በህግ ፊት ያከትማል። ስለዚህም በዚህ ህግ መሠረት አንድ ሌባ የሰረቀውን ዕቃ ከ30 ዓመታት በኋላ አደባባይ ወጥቶ “ግዙኝ” ቢል፤ ማንም አይናገረውም፤ ማንም አይከሰውም። የተሰረቀው እቃ ንብረቱ ስለሆነም የህግ ከለላ ይደረግለታል።

Click to comment

Leave a Reply

Your email address will not be published. Required fields are marked *

በብዛት የተነበቡ

To Top