ዘባሪቆም

ትዝታ ሲጨለፍ

ህግ ወጥቶላቸው በህብረተ-ሰቡ ዘንድ ወደ ተግባር የገቡ ቅጣቶች አያሌ ናቸው:: ቅጣቶቹ መኖራቸው ጥሩ ነው:: አስተማሪ ሆነው ወደ ፊት በጎ በጎው ተለምዶ መጥፎው ይወገዳል::

መጥፎውን ለማስወገድ የሚተጉ አስፈፃሚዎች ራሳቸው መጥፎ ነገር ሲደርጉ ማየት ግን በጣም ያማል::

 አጥር አትጠር ያሉት ህግ አክብሮ ሲተው ከጎኑ ጃን ሜዳን የሚያህል ግቢ ሲያጥር አይተው እንዳላዩ ሲያልፉ ዕውን ህግ ለሁለቱም እኩል ነው ያሰኛል::

ጎኑ ትልቅ ህንፃ ሲሰራ ዝም ያሉት አንዱ ቱቦ ቢቀድ ይቀቱታል:: በማስጠንቀቂያ ወረቀት ያዋክቡታል:: በቃል ያስፈራሩታል::

መሥራት ያልቻለው ወገን ወደ ሊቢያ ተሰዶ ውሃ ሲበላው በዜና ላይ ሲያዩ ግን ከሰው ጎን ሆነው ያለቅሳሉ:: በፊት ሲያለቅስ የሳቁበት ወገን አስክሬኑ ሲመጣ ከቄሱ በፊት ነጠላ አጣፍተው ሰውን አላስገባ አላስወጣ የሚሉት እነሱ ናቸው:: ሟቹን አላስወጣ አላስገባ እንዳሉት ሞቶም አይተዉትም::

 ህግ መከበር አለበት:: ለሁሉም በዕኩልነት:: አንዱ ስለሰጠ ሌላው ስላልሸጎጠ መጋፋት የለበትም:: ወይስ እንደ እግር ኳስ ጨዋታ ለነዚህም ኮሚሽነር ይመደብ?……

ብዙ ህጎች አሉ:: ወደፊት በየተራ እናያቸዋለን:: ለዛሬው ፅዳትን በተመለከተ እንሆ….

“መሽናት ክልክል ነው” የተባለ ቦታ አንድ ሰውዬ ፊታቸውን ወደ ግንቡ አዙረው ቆመዋል:: ደንብ አስከባሪዎቹ ከኋላቸው ሆነው የቅጣት ወረቀት ላይ ሊፅፉ አቆብቁበዋል::

ቢታይ … ቢታይ … ሰውዬው አይሸኑም::

 ደንብ አስከባሪዎቹ ተናደዱ:: ሸንተው ዞር እንዲሉና ሌላው መጥቶ እንዲቀጣ ነው ፍላጎታቸው::

ሰውዬው ቆመዋል:: ደንቦች ተናደዱ::

“ስማ!” አለ አንዱ ደንብ

“አቤት!” ሽማግሌው መለሱ

 “የቅጣት ወረቀት ተቀብለሃል?”

 “ለምን?”

“የተከለከለ ቦታ ስለሸናህ” ቆጣ ብሎ ተናገረ ደንቡ

 “ኧረ ህግ አክብሬያለሁ”

 “አልሸናህም?” አንቱ ማለትን እንደ ክብር ቆጥሮ አናንቆ ጠየቀ::

 “ይኸው!” ፌስታል ላይ የሸኑትን አሳዩት:: መሬቱ ላይ ጠብ ያለ ነገር የለም:: ፌስተሏ ቋጥራዋለች::

 ደንቡ ተናደደ:: ማመስገን ሲገባ ናቃቸው:: አመናጭቆ ሸኛቸው:: እሳቸውም ሽንታቸውን ይዘው ወደ ቤታቸው አዘገሙ::

 ሀኪም ቤት ሊወስዱ ነው እያሉ ደንቦቹ ሳቁባቸው:: ግን አከባቢን ካለመበከልና የራስን ጤንነት (ከመቋጠር) አንፃር ሰውዬው ሊመሰገኑ ይገባ ነበር:: ግን መቅጣት ህግ ማስከበር ቢሆንም ማስተማር ቢቀድም ሸጋ ነበር::

 የሆነ ሰውዬ ደግሞ አከባቢው መፀዳጃ ቤት ስለሌለ የተፈጥሮ ነገር አጣደፈው እና ግንብ ሥር ይሸና ጀመር::

ሁለት ባልቴቶች ደንብ ለማስከበር ካርኒ ይዘው ተጠጉት::

 “አቤት!” አላቸው

 “መሽናት ክልክል ነው” አሉት

 “በተፈጥሮ?”

“ማለት እዚህ ቦታ….”

“ታዲያ እዚህ ቦታ በሉ ቦታ….ሆ!”

“እሺ!”

“እና!”

“አምስት ብር ቅጣት አለብህ!” አሉት አንደኛዋ ካርኒ ላይ ሊፅፉ እየዳዱ::

“እሺ… ይኸው አሥር ብር”

“ዝርዝር የለህም?” አሉ ጓደኛዋ

“የለኝም!”

“እሺ ዘርዝሬ ልምጣ” አሉ ሮጡ::

ቤንዚን ማደያ ሱቅ ጀብሎ ዘንድ ጭማቂ ቤት ሄደው ዝርዝር ስላጡ ተመልሰው መጡ::

“ልጄ ዝርዝር አጣሁ!” አሉት::

“እና?” ሰውየው ጠየቀ::

“አይይ….” ተቅለሰለሱና “እዚያ ጥግ ላይ

ያኛውንም ተፀዳዳና ይጣጣ!!” አሉታ::

17/10/2011

……………

ረዥም መንገድ ሲጓዙ ጨዋታ ከሌለ ድብርቱ አይጣል ነው:: ሹፌሩ እንቅልፉ ሊመጣ ይችላል:: የመኪናውን ድምፅ ሁሉም እያዳመጠ ብልሽት ያለ እየመሰለው ይሰጋል:: ቆም ብሎ ቡና የመጠጣት ሱስ ያለበት ሰው ቢኖር ጨዋታ እና ወግ ከሌለ ምኑም አይጣፍጥ:: አይጥመውም::

ይኸን ጊዜ ቀልደኛ ሰው በብርቱ ይፈለጋል:: ጨዋታ እንዲያመጣ ኃላፊነት ይጣልበታል:: እኔም ይኸው ገጠመኝ::

የሆነ ቦታ እየተጓዝን ነበር:: ዝምታ ሰፍኖ ሁሉም ውጪ ውጪውን ሲመለከት “ኧረ ደረጀ ጨዋታ አምጣ!” ተባልኩ::

 ነገር ሳውጠነጥን ቆየሁ:: ለመፀዳዳት እና አየር ለመቀበል አንድ ሥፍራ ስንቆም ፈገግ የሚያሰኝ ነገር ልፈጥር ተሰናዳሁ::

 ትንሽ እንደተጓዝን የሆነ ሰው አየሁና ሹፌሩን እንዲቆም ጠየቅሁት:: መኪናው ቆመ:: ሁላችንም ወረድን:: አየሩ ደስ ይላል:: ያየሁት ሰው ለጉዳዬ ምቹ የሆነ ይመስላል:: ሰውዬውን ጠጋ አልኩት:: ሁሉም ተጠጉት:: ሰላምታ ተለዋውጠን ጥያቄዬን ጀመርኩ::

 “ግርማን ታውቀዋለህ?” አልኩ

“ግርማ…ግርማ…” አሰበ እና ራሱን

እንደመነቅነቅ አለ

“ግርማ…ረዥም” አለኝ

“አዎ!”

“ሲሄድ የሚያነክስ?”

“አ….አዎ!”

“መልኩ ጥቁር!”

“አዎ!”

“የፊት ጥርሱ ወላቃ?”

“አዎ!”

“ሞቷል እኮ….!” አለቀሰ::

ሰኔ19/2011

Click to comment

Leave a Reply

Your email address will not be published. Required fields are marked *

በብዛት የተነበቡ

ደብረ ያሬድ አሳታሚ ኃ/የተ/የግ/ማህበር በንግድ አዋጅ ቁጥር 980/2008 ዓ.ም መሰረት ተመዝግቦ በየወሩ የሚታተም በስነ-ጥበብ፣ ባህልና ትውፊት፣ ታሪክና ቅርስ እንዲሁም ማህበራዊ ጉዳዮች ላይ የሚያተኩር መፅሔት በ2009 ዓ.ም ተቋቋመ።

አዘጋጅ

 ስራ አስኪያጅ ፦ ዕቁባይ በርሀ
ማኔጂንግ ኤዲተሮች ፡- መኩሪያ መካሻ | ዓለማየሁ ገ/ሕይወት
ዋና አዘጋጅ ፡- ደረጄ ትዕዛዙ
አዲስ ከተማ ክ/ከተማ ወረዳ 6 የቤት ቁጥር 540
Meshetu61@gmail.com ስ.ቁ:- 0925427696

የዝግጅት ክፍሉ አድራሻ

ፒያሳ ቸርችል ጎዳና ከካቴድራል ት/ቤት ፊት ለፊት ካንትሪ ታዎር 7ኛ ፎቅ
ስ.ቁ:- +251 18296194 ፋክስ:- +251 11266736
ኢሜል: debreyaredpublisher@gmail.com

To Top